臥龍正宗成都麻辣火鍋 (已結業)

環境可以, 食物方面無咩特別, 睇張火鍋紙覺得價錢唔太貴, 但嚟到D 份量其實少到根本要繼續叫嘢食, 最終埋單價其實同食貴hot pot 無咩分別, 但如果咁既埋單價, 仲有好多更好選擇!雲吞同餃類有D 似超市買, 無咩料, 叫份細既桂花魚, 百幾蚊但得5-6塊完整既魚片, 其他都係帶骨既頭頭尾尾。本來想叫筒蠔但始終無叫, 因為俾$188 嚇親, 從未試過筒蠔要咁貴, 但因為無叫, 所以唔評論啦, 只係俾個價嚇親。不過服務態度認真麻麻, 見隔離枱唔知發生咩事同負責人理論, 雖然旁人唔係完全清楚哂件事, 但喺個客有不滿而其實無講D侮辱性說話情況下, 反而負責人黑哂面仲要鬧反個客咁既語氣, 見到都有D 驚訝, 而家既服務性行業雖然未必間間做到出色服務, 但話反個客轉頭真係好耐無見過。總括嚟講, 唔會再去, 亦唔會推介。