品僖小廚 (已結業)

我哋兩位入去堂食，全部卡座，檯都畀單人食客坐哂單邊，店家就安排我哋同其他人搭住檯先，但店家之後就無啦啦叫其他食客坐埋一堆，吉左張檯出嚟，但出面又無客等檯，又無安排我地轉檯，奇怪。卡座都幾逼，對面個食客又不停咳同清喉嚨幫我哋啲飯餸「加料」，其實都幾難受。講返食物，今日個午餐1號，白汁雞皇飯，無乜味道又唔夠熱，啲雞口感好老。午餐2號，芙蓉蛋飯，個芙蓉蛋急就章咁出貨，唔夠乾身同油膩感重，最大鑊係咸到要洗腎咁滯。或者你會話，48蚊午餐你想點啫？ 但有時煮嘢花多少少心機，樓面留心吓食客多少少，嗰度其實所費無幾，但畀食客嘅感受又可能會好啲。差唔多食完依餐飯大約12點幾，應該係正值飯市最旺嘅時間，但回望四周，得三兩檯客。其實唔怪得人唔想係香港消費，如果你覺得打得開門做生意啲人就會自動送上門，人哋至多做一次傻仔，係唔會回頭再幫襯你。或者老闆你可能唔Care 啦。