京滬村 (已結業)

今日慶祝家人生日嚟左京滬村食飯。我哋一坐低就即刻叫咗個片皮鴨三食，但由於製作時間要40分鐘。咁先叫咗其他點心頂住肚餓先， 我哋叫咗小籠包同三鮮鍋貼，水準都可以。至於個拼盤就差少少，海蜇賣相嘅顏色好唔吸引。 牛切得比較大舊，難咬。 雞絲粉皮就不過不失。椒鹽骨嘅份量非常之多，喜出望外。嫩雞煨麵湯底好淡。反而上海粗炒嘅麵煙煙韌韌，幾好食。主角隻鴨終於出場，大大隻漲卜卜。由於新鮮烤出嚟，食片皮鴨相當好食。另外侍應姐姐片咗幾片鴨胸皮出嚟，話係最多油份最香囗，要蘸有糖食，我就唔敢食啦。另外兩食就係用鴨殼滾湯同埋炒鴨絲。另外講下環境，大門口要行樓梯上一層，對老人家不是太方便，走嗰陣侍應又冇話畀我哋聽邊度有𨋢搭，咁我當無。另外地方有點逼，而且冷氣又會自動熄機，希望可以改善一下。