農家菜館 (已結業)

呢日同屋企人一行二十幾人到位於屯門藍地嘅農家菜館預祝母親節，餐廳總共有三層我哋喺中間嗰層用膳。生炒排骨($68)，排骨夠入味，外皮鬆化，醬汁酸味妹好開胃！時菜炒牛肉白菜仔($58), 牛肉有牛味，唔靭又份量足，白菜仔吸左D牛肉味好好食。頭抽豉油鷄($168), 豉油味咸甜適中鷄肉入味得嚟夠嫩滑，正！農家炸子鷄($208)，鷄皮香脆，鷄肉嫩滑入味，無得輸！可惜唔記得影相。小炒王($78)，呢個餸係全晚精彩之中的精彩，鮮魷、鮮蝦、蝦乾炒韮王，炒蝦乾的香味令全個餸好好食之餘仲有一種好好食的味道，老闆賣關子話係秘製香料，呢個餸嚟到一定要試！松子黃魚($168), 黃魚鮮嫩一D都唔腥，脆醬鬆化，加上個酸酸甜甜的醬汁入面有松子、菠蘿、椰果、青椒等，好味又口感豐富。蒜蓉粉絲蒸鮮魷($98)，鮮魷量足新鮮又唔靭，蒜蓉令到鮮魷更味美，碟底的粉絲吸左鮮魷的味道更加係無得彈！最尾送嘅雪耳木瓜糖水飲落非常清潤，啱晒平時夜瞓嘅我。總括嚟講呢餐嘅餸菜都非常味美，埋單每人都只一百蚊左右，我會再嚟幫襯!