金城餐廳 (已搬遷) 新店位置

呢間餐廳因為有阿蘇撐，所以未入去醫下個肚。點知第一次幫趁就帶來有驚無喜。我叫了一個常餐加杯凍飲，要$24，心諗應該會食得飽，但個餐原來得２隻超細的煎蛋，再加個小型餐包，另外再一碗迷你得誇張既火腿絲通粉，嘩！咁既份量收我廿幾蚊認真好賺，快餐店都好過佢。唉！都算喇！點知我一開餐就即刻嚇個半死，我竟然見到隻蛋裡面有一絲金屬物體，驟眼似釘書釘，咁搞法我緊係即刻同個侍應阿叔反映，我叫個阿叔睇下條金屬物體，佢仲問番我轉頭係咩黎？我話蛋裡面有釘書釘，佢再睇清楚再捽兩捽，然後話唔係釘，而係鋼絲擦的鋼絲，佢仲覺得好似若無其事，我即刻反駁佢話鋼絲線咪即係金屬囉！用來擦鑊，污漬無哂！如果我唔小心食咗咪要入醫院。我叫佢換過碟俾我。其實我都算好人，而且個阿叔D態度都算OK，所以無call 999同食環署，否則肯定見報兼臭名遠播，阿蘇話好食都冇用。呢次係第一次亦係最後一次幫趁，絕對冇下次。