彤福軒

營業中

休息中

爸媽生日難得出城梗係要食好西，揀咗Rosewood嘅彤福軒，坐低直接揀咗點心套餐唔使煩，最緊要阿爸阿媽食得開心。先嚟個小型點心拼盤，入面有松茸遼蔘燒賣、彤福拆魚餃同鹹檸檬星斑餃，三個點心造型同味道都一百分，我自己最鍾意拆魚餃，師傅用新鮮桂花魚拆肉做嘅，入面好多魚肉好新鮮，另外佢個雞泡魚造型都好靚好得意。第二度菜彤福生拆鮮魚羹，熱辣辣上枱真係好正，除咗啲魚肉好新鮮之外，佢啲果皮都好香。跟住就食芋蓉香酥鴨，件香酥鴨係先拆肉再做芋蓉酥皮去炸，另外紅色嗰兩粒墨西哥辣椒仔都好好食，唔辣但係好香辣椒味。第四度小黃菇菊芋燴菠菜苗，菠菜苗好嫩好新鮮，菊芋原來即係雅支竹，口感同味道似鮮淮山加栗子加白果嘅混合體，好味。最後一味係上湯鮮蝦魚皮角，三條魚仔喺個碗度游吓游吓咁真係好精緻，魚皮國嘅皮好薄，所以食落去少少皮啖啖肉感覺好好。因為係阿爸阿媽生日所以我哋將個甜品加錢upgrade做甜品拼盤，影埋幅靚相就大功告成。