Vici Restaurant & Bar (已結業)

荃灣掃街多野食唔係新聞，經過門口見到呢間環境唔錯，即管入去試下。我哋嗌左6串串燒，3串蔬菜3串肉，個冬菇令我有驚喜，好入味又夠冧。日式串燒當然要試燒大蔥，燒得啱啱好，咬落多汁，證明師傅功架唔錯。安格斯牛小排燒出黎十分嫩口又juicy，最緊要一啲都唔靭！雞軟骨好大粒，有肉食，好脆。仲有薩摩赤雞翼，雞皮燒得好脆好香，一啲雪味都冇。鯖魚喺魚皮上面𠝹左啲坑紋黎燒，令魚肉香嫩滑得黎又可以鎖住肉汁，燒完唔會乾。除咗無咩魚骨外，亦都唔有魚腥味，作為鯖魚愛好者嘅我，呢間餐廳嘅鯖魚絕對係可以encore😋 至於個豬肉眼呢，肉多滑，唔會𡁻到個口好攰，而且配咗個酸酸甜甜嘅醬好開胃，同個肉好夾。每人叫咗杯cocktail，其中Happy Ending嗰杯嘅百香果味同青檸好出，勁refreshing，真係名副其實happy ending。