瀚林廳 (已結業)

今晚我們去咗尖東「海景嘉福酒店」嘅「瀚林廳」參加好朋友嘅婚宴！大紅乳豬全體：雖然皮脆肉嫩，但有一層好厚嘅肥膏，有啲美中不足！翡翠花枝蝦球：蝦球好爽口彈牙，花枝片唔太爽口同比較腍，西芹有根同有草青味！香酥脆蟹鉗：賣相炸得金黃香脆，但味道就淡而無味！蟹肉扒時蔬：蟹肉嘅份量比較少，西蘭花亦有草青味！花膠菜膽燉北菇湯：完全無湯味，花膠係一早白灼好之後放落湯面，完全唔係一盅燉湯嘅做法！碧綠鮮鮑片：鮑片好似無經烹調過，就加上鮑汁，小棠菜亦未煮熟，有非常濃烈嘅草青味！清蒸老虎斑：肉質都幾新鮮同嫩滑！當紅炸子鷄：都幾皮脆肉嫩，鷄味都幾濃郁！金絲燴伊麵：炒得一啲都唔乾身，非常濕同麵質過腍，味道淡而無味！鮑汁鷄粒炒飯：炒飯好「鞋」，味道亦都係淡而無味！蓮子百合紅棗茶：有一種怪怪嘅味道！合時鮮果盤：係本人從未食過咁難食嘅果盤！西瓜嘅色澤好似唔正常嘅血紅色，有點嚇人！食落係完全無味！哈蜜瓜同蜜瓜雪到變壞咗！士多啤梨極之非常酸！我真係想像唔到作為一間幾星級酒店嘅中菜廳，以一萬二千幾蚊一圍嘅價錢，出品食物嘅質素可以咁差劣，真係失敗之中嘅失敗！