一燒窰 (已結業)

呢間小店差唔多每個月都會去一次，因為食物烹調用心。雖然地方細細，但都坐得舒服，店員細心有禮。頭兩次去到等位都要超過1個鐘，所以都放棄咗。之後早少少6點半左右去到，就每次都唔洗等位入座。每次去到，店內裝飾都有D唔同  由於疫情關係，四人枱都會有塊隔板，我地兩個人就會坐同一邊。食物係即煮，無咁快，先嚟飲品。必食推介有 松露燒蠔。之前試過四式燒蠔，四款裡面食過之後覺得黑松露最鐘意食，所以今次四隻都點黑松露口味。啱啱燒出來，熱辣辣，好多汁。鵝肝多士 亦都係每次必食。入口即溶，多士好脆。原條鰻魚定食，配有麵鼓湯同螺肉小食，份量都算大，我地兩個人Share，鰻魚好厚肉，鰻魚汁都好濃郁，呢個都係每次必食。另外點咗芝士焗薯蓉、蒜蓉焗野菌、燒雞中翼、煙肉露荀卷、芝士明太子玉子燒，每樣食物水準都唔錯，幾好食。唯獨燒雞中翼比較乾，唔太推介。