水門雞飯 (裕民坊YM²)

營業中

休息中

觀塘裕民坊商場YM2連接室內有蓋巴士站，可以涼住冷氣等巴士真係好正。前幾日我見咁啱miss左班車，就決定喺附近醫醫肚，點知就俾我地食到呢間水準好高、但價錢親民嘅泰國菜「水門雞飯」！呢度鋪位唔算好大，但新裝修嘅關係好光猛舒服。餐廳雖然主打雞飯，但餐牌都有唔少其他泰國菜嘅選擇。俾大家望下個menu先～既然呢度招牌菜係水門雞飯，但呢度原來仲可以選擇雙拼炸雞，又可以加$10 upgrade雞腿肉，一於試下！先講炸雞：炸得外層好香好熱好脆，但裡面嘅雞肉仍然好juicy。而水門雞就好滑好有雞味，配合埋啲醬汁同油飯一齊食真係好惹味！另一個主食我地就食左鳳尾蝦炒金邊粉。呢碟金邊粉份量頗大，賣相吸引，而且唔會炒得太油。值得一讚係啲蝦肉幾爽口彈牙，一啲都唔會霉。呢度嘅甜品有我每次去泰國旅行一定食嘅芒果糯米飯。我最怕啲芒果好酸或者啲肉多渣，但好彩呢度嘅芒果質素頗高，而糯米飯亦唔會太甜！飲品方面，我地叫左一杯芒果冰、一杯龍眼水。兩杯飲品都冰透心涼，而且唔會死甜，唔錯！總結：呢間餐廳食物質素好，價錢親民，值得推薦。