龍景軒

營業中

休息中

好同事生日，我都會同佢一齊嚟食餐飯，情意結。坐定定就叫壺普洱茶品吓先。今日我發板，先食件龍蝦餃，龍蝦鮮甜彈加上粉葛嘅爽，再配上芹菜嘅香，咁複雜嘅味道夾得天衣無縫。每一次都叫鮑魚雞粒酥，每一次質素都保持得咁好。黑椒牛柳腐皮卷，牛柳有咬口牛味濃。片皮乳豬皮脆，肉分開兩層，一層肥加一層厚，細細一件食咗都冇罪惡感。蜜汁叉燒半肥瘦加少少🤏燶邊。蟹蓋係用唔記得咩蟹😅，新鮮拆肉，再加埋奶入去炸，鮮甜香脆，配菜上面仲有少少🤏金箔，要食埋去呀。銀杏扒鮮枝竹，睇落好似係甜品咁😅，食落鮮枝竹好滑又香。金銀蛋莧菜，每一條都係一樣長短，唔會有渣。鮑汁花膠鮑魚絲撈麵，每一次都會食，麵爽彈有咬口，仲好好掛滿啲鮑汁，生日當然要食麵啦。食午餐用咗三個鐘，最後食唔到甜品，服務員都知道我哋好飽，送上一點心意，咁就完美一餐。