韓牛韓式燒烤 (已結業)

旺角放題選擇好多，但往往唔知點揀好，今次就揀咗間位置方便又抵食嘅試吓。雖然係平日星期三，但我哋去到都爆咗場，好彩唔係等左好耐就入得。呢間野都算好多嘢食揀，首先韓式燒料方面，基本嘅豬牛雞魚樣樣齊，仲有好多菜類揀，最正係佢哋有提供生菜比我哋包肉食，減低油膩感。個人最鍾意佢哋嘅牛仔骨，肥瘦適中，而且醃得好夠味又不失牛味，最緊要係平時買牛仔骨食真係好貴，依度任食真係抵！仲有樣好正嘅就係沙白，好夠鮮味之餘仲要無沙，雖然唔會好似花甲咁咁厚肉，但係任食仲要咁新鮮，隻隻都開到口又無沙，真係好抵食！熱食方面都有幾種選擇，炸物質素都唔錯，因為主要係燒嘢食，所以都無試太多。海鮮吧啲海鮮都好夠份量，而且refill得好快，雖然個人唔好海鮮，但試咗幾樣都幾正，都係回本之選！食飽飽就到甜品，真係好多選擇，又有朱古力噴泉，水果，雪糕，中式糖水糕點，同竟然有以前_ _樂園成日賣嘅棉花糖！咁多樣入面其實我最愛個開心果味雪糕，出面都好少見好特別，正！最後提埋佢真係好多嘢飲揀，啤酒都有幾款，不過大家要回本就唔好飲太多啦！🤣