台食館 (福榮街)

營業中

休息中

芋泥奶啲芋圓幾好食，啲奶都好飲，就係芋泥好少，飲黎冇劃芋泥奶味，都算飲奶多，唔係特別甜，對我黎講整體黎講都ok，鍾意甜嘅人可能會覺得佢唔夠味啦⭐️⭐️⭐️木瓜奶一般般，唔係話難飲，但下次唔會嗌⭐️⭐️麵線認真一般般，加左醋先叫好左少少，個味道又唔甜又唔鹹，冇乜味咁，下次唔會再嗌⭐️香酥綜合飯-有台灣腸、滷肉、鹽酥雞、魷魚鬚整體黎講我覺得幾好食，加上佢啲份量都唔少，台灣腸好正常，就係一般街邊都有嘅腸，滷肉味道都好正常，對我黎講啲滷肉份量都足夠，另外鹽酥雞幾好食，但略嫌有啲乾身，最好食嘅估唔到係魷魚鬚，大大條啖啖肉，食落仲有啲甜甜地，魷魚鬚係一定會再食!⭐️⭐️⭐️⭐️鹽酥雞拌麵-鹽酥雞就同上啦，份量多﹑味道唔差但略嫌太乾身，拌麵上面啲滷肉份量都合適，話晒主角都唔係啲滷肉，拌麵反而有驚喜，食食下食到啲酸酸甜甜嘅味道，睇真啲原來係加左啲酸菜，加左酸菜同青瓜絲之後係中和左滷肉拌麵嘅油膩感！唔錯！⭐️⭐️⭐️⭐️至於鋪頭方面，晚市時間去人唔算多，多係多在嗌外賣嘅人，服務員嘅態度都唔差，要去抹枱都會同我講聲唔好意思，嗌落單都會叫我停一停，嗰陣時都好忙，佢地都有好多外賣要包，但係隔左陣就有人黎落單，服務態度都幾好。