羅麥記 (V City) (已結業)

今日去開屯門，同朋友行街見到呢間叫做羅麥記嘅餐廳，入邊嘅裝修十分懷舊，亦都好有本土香港特色，覺得幾得意所以就入去試吓呢間餐廳。揭開個餐廳嘅餐牌都有好多香港特色嘅食物，例如香港人最鍾意嘅撈麵，有雞翼撈麵，卡邦尼撈麵。亦都有西多士蝦多士等懷舊食物。我哋就比佢嗰個磚頭焗飯吸引左。佢係一個麵包入邊有焗飯，焗飯嘅選擇包括有黑椒雞扒，番茄豬扒，咖喱軟殼蟹同白汁海鮮。我哋最後呢就叫咗焗番茄豬扒飯。佢個麵包份量都好多，反而焗飯就少啲，但係豬扒嘅份量亦都好多，食一個飯已經係好滿足多到食唔晒個包😂另外我哋都叫咗一個羅麥雞翼有得揀辣或者唔辣我哋揀咗唔辣嘅。其實所謂羅麥雞翼都應該係瑞士雞翼黎嘅。飲品方面我哋就叫咗雪糕紅豆冰同粒粒紅豆冰奶茶。佢個粒粒紅豆冰奶茶特別嘅地方就係啲冰係紅豆冰嚟嘅，溶咗就會有粒粒紅豆係個奶茶入邊非常之特別。總結來講啲嘢食都好懷舊，食返以前香港嘅味道，非常值得推介！