肥仔雲南小鍋米線

營業中

休息中

一向好鍾意食米線同食辣嘢，個個星期都幫襯連鎖店米線開始覺得有啲悶，於是上米線關注組睇下有咩推介。咁啱見到有間喺九龍灣，方便我返工時去食。自從食過一次之後，就成日都掛住好想食，好似上咗癮咁前排疫情全日停堂食，只做外賣。今個星期開返堂食梗係即刻去幫襯米線有麻辣、酸辣、蕃茄湯、清湯、酸辣粉同撈米線。米線餸菜同小食選擇都好多。腩肉係招牌餸菜，差不多次次都會揀腩肉。滷過嘅腩肉比一般少肥肉，一啲都唔油膩，味道微辣帶點甜味，好特別芫茜係計一個餸，所以份量好足鍾意芫茜嘅人就啱晒麻辣湯底由bb辣至大辣，通常都揀小辣，食落同譚仔二小辣最接近。麻辣湯底嘅麻同辣好平衡，雖然偏重口味，但食完唔會特別口渴。米線煮得剛剛好，滑得嚟唔會煮得太腍麻辣小鍋米線本身包括配料肉碎、酸菜、芽菜同韭菜。肉碎好惹味，肥肉比例比一般嘅餐廳少，感覺無咁肥膩總括嚟講食物質素高，雖然價錢比連鎖店貴少少，但餸菜選擇多而且份量多。自從食過一次之後，差唔多每星期都會幫襯，可以話係我最愛嘅米線店。