滿屋日本料理 (大鴻輝(荃灣)中心) (已結業)

今日朋友特登嚟慶祝我生日請我食放題，估唔到佢揀咗呢間咁高質素嘅放題，所以都要好好記錄一下。座位夠闊落，我哋揀咗呢個“D”極緻套餐基本上係所有餐牌內嘅食物都可以點，我哋當然要選擇由最回本以及凍盤出擊，點左松葉蟹。雖然話要回本但係如果質素唔好成真係唔會繼續食，頂住個胃。但係呢度嘅蟹係好鮮甜，好有蟹味，肉質夠實唔會霉，蟹腳大大條，食落啖啖肉，一流！其次當然係佢哋嘅刺身啦，我哋都食過唔少放題，呢度嘅刺身質素明顯比出面優勝。食到刺身嘅鮮味，唔會雪到冇曬味，淨係赤蝦我都食晒10幾隻，有蝦甜味又大隻，啖啖彈牙蝦肉，超滿足。拖羅，油甘魚，帶子等等我地都食左好幾輪。而且佢呢度嘅刺身款式好多，。估唔到仲有海膽會有唔同嘅配搭畀你揀，加青瓜同三魚籽籽我就最鐘意，鮮甜味提升，好味道！之後當然都好似其他放題咁有串燒，熟食，卷物，天婦羅，鍋物等等質素高，天婦羅蝦又係食到停唔到，薄脆外皮加爽口蝦，食左8，9隻回本。我欣賞嘅就係佢哋嘅食物係好多款式，炸榴槤，咖哩蟹，鮑魚,鵝肝呢d都少有。出面嘅飲品嘅選擇都同其他放題唔一樣，特別係有花茶同埋本地嘅飲品，絕對會回頭嘅放題！