SuperNormal (淘大商場2期)

營業中

休息中

每次諗起想食鹹豬手，就一定會去依一間淘大嘅supernormal , 佢驟眼睇起嚟好似一間酒吧咁，放工同埋同事坐低飲吓食吓真係幾chill. 今次俾我哋發現佢除咗有食開嘅脆皮鹹豬手，仲多咗個四周年優惠嘅原隻脆皮燒雞。坐低點完豬手同燒雞，因為即刻準備要大概半個鐘，就再點咗啤酒同埋特飲。杯Flower ball 雞尾酒有甜酸嘅果汁味，加上淡淡嘅酒香，好適合配鹹豬手烤雞等比較heavy 嘅食物。飲下傾吓豬手就上嚟啦，用咗麥啤浸柚子造成嘅脆皮德國鹹豬手，塊皮真係脆到卜卜聲係鬆脆唔係硬，就係咁樣令到我成日都會掛住佢。裏面嘅鹹豬手肉唔會太鹹啖啖肉，亦都唔會乾，配埋酸菜一齊食，又或者點佢嘅特色醬汁都好啱。啱啱食咗幾啖鹹豬手，隻原隻脆皮燒雞就上場啦！佢唔係出邊嗰啲細細隻嘅春雞，而係大大隻皮脆肉厚又多汁嘅燒雞。食起嚟有少少威士忌酒香，兩樣都係可以慢慢食，慢慢傾偈嘅菜色，咁就可以輕鬆渡過愉快嘅一晚啦。