古早牛肉麵 (已結業)

深水埗多好野食就係人都知，今日就去左呢間古早牛肉麵度食個午餐。呢間餐廳最吸引我既一定係裝潢，入到去係有舊台灣既感覺，除左味覺享受，視覺既享受都比埋你。我地兩個人叫左兩個主食兩個小食同杯飲品。首先係古法滷水大雞腿肉燥便當，同個名一樣，係一隻大雞比，滷水唔會太咸味道啱啱好，配埋肉燥送飯真係味道唔錯；另一個主食係醬油豬軟骨乾拌麵，點餐果時可以揀麻辣醬/肉燥醬，我地就揀左麻辣醬，豬軟骨同麵既份量都好足，雖然話係麻辣，不過都唔會話太辣，反而好香，如果想食辣啲可以加枱麵上既辣醬，會另有一番風味；小食我地揀左麻辣牛肚絲同鹽穌大雞扒，牛肚絲切得都好闊身，食落好有口感，加埋麻辣醬真係一流，另外鹽穌雞扒可以揀唔同既味，我地就揀左海苔，食落咸咸地唔錯。最後飲品係奶蓋紅茶，奶蓋做得幾“杰”身，配埋淡淡既紅茶作為結尾真係好滿足。