壽司德 (已結業)

之前聽講話呢度嘅壽司水準不俗。趁假期偕太座一試...人流不多，似乎大部份人仍外遊未歸。席上差唔多所有客都係日本人，似乎有D計咁wor..大廚為一年輕日本師傅，帶住兩個香港師傅仔。其中一個仲好似响度練習緊切蘿蔔片...諗諗吓都係唔好咁大期望...其他甚麼tempura都唔諗，只係叫個自選八件及十四件sushi set...望住張order紙，見到三文魚，個心馬上一沉；其他都係一D大路嘢如甜蝦、蛋、飛魚子、吞拿、油甘等等，有D失望，不過，呢D基本嘢有時仲考師傅功力呢...全部sushi都由年輕日籍大厨包辦。睇見佢雖然要用多過三手先完成一件，功夫好似仲爭D，但佢好專注，印象分增加唔少...卒之有得食。賣相確實不俗。整体水準算係可以嘅，特別係飯團，當然用上日本米，揑得不太實之餘又沒有散掉，醋嘅份量亦落得剛好，唯一美中不足係size太大件嘞，跟傳统江户前壽司嘅習慣並不一樣...此外，wasabi嘅份量似乎下得太多嘞，有D搶咗魚嘅鮮味...魚嘅新鮮度亦夠。chutoro入口即溶亦有少許咬頭；左口及油甘較清淡；可惜稍嫌魚切得太厚身，所謂"吃巧不吃飽"ma...蛋嘅做法係用蛋入面卷住壽司飯嚟食，頗特別