榕記車仔麵 (已結業)

今日放工同朋友去左屋企附近食宵夜，本身諗住去食個甜品，簡單又好味，點知朋友大叫肚餓，我地即刻轉場去左食車仔麵。將軍澳附近有間車仔麵，主打足料湯底，我叫左一個白果胡椒豬肚湯底，一上枱湯底好香好濃，入口第一啖好鮮甜，香濃豬肚湯唔會有腥味，奶白色完全唔油膩，入口好香濃！唔係味精湯底好抵讚！我叫左蘿蔔、牛丸、豬頸肉，三個餸超滿足！超鐘意蘿蔔吸哂湯汁入口超滋味，蘿蔔又夠軟腍，牛丸粒粒好彈牙！豬頸肉極讚，入口爽口爽嫩，中間有陣陣油香！麻醬雞絲粉皮，麻醬香濃有芝麻香，雞絲唔會鞋口，入口有清甜雞肉味，青瓜絲夠清甜，與麻醬攪拌食用味道好清爽，唔會太飽濟！下次再黎試下其他湯底！