黃枝記 (已結業)

是咁的。本黎無意食碗面打篇食評。奈何醫肚而面未到之際。隔離位呀叔碗面一黎就落左四份一枝醋落碗面到。心中一怕！話說對上一次黎食已係未搬之時。唔通差左咁多要浸醋先食得落？到我碗細蓉一黎。即刻伸個頭埋去聞一聞先。好彩並無刺鼻既梘水味。嚇得我呀！先講下去個面。係真正既爽滑彈牙。啜入口知佢有幾滑幾輕身。咬落就知乜係爽同彈牙。就好似你咬佢落去有啲會咬得斷有啲會彈返開唔斷。真係幾過癮！雲吞呢？蝦仁同豬肉比例正常。細細粒一啖一粒。散尾之餘重疊位唔會一舊厚皮咁。湯底冇梘水味。所以唔洗溝醋。其實食面落醋呢個習慣係因為坊間有啲面檔。為左令啲面彈牙啲。落梘水落得重手。面身既梘水味大過濃郁。所以先有食前點醋去中和番。又或者連個湯都有梘水味就落啲落個湯到。咁當然有可能隔離位呀叔比較鍾意酸性食物啦。但係你問我。我完全覺得碗面係被浪費左。