撈得喜火鍋冰室

營業中

休息中

經網友介紹話元朗呢間火鍋店最抵食，睇openrice見D配料相片，其實無咩期望。見$178位都唔算貴，即本睇下咩料子！地方唔算大，但大部份座位係卡位，坐得舒服又有私人空間。湯底好多選擇，有不同麻辣烤魚，秘制麻辣雞煲，椰子雞煲，水煮魚，酸菜魚...全部都係食左先打邊爐，唔怕餓親。見隔離檯D烤魚好大條，兩個人怕食唔哂最後我地叫左酸菜魚，好快就上左檯。唔係講笑，好鬼足料，食完應該飽晒！魚片連皮好正，唔算多骨，湯底味道剛剛好，食到一半就開始打邊爐。自助形式，款式都係大路野，但要推介佢哋嘅手切牛肉，睇個樣唔吸引，但食落牛味香濃，又唔韌，真心回本！手打鯪魚肉丸，呢個堅真材實料，所以都食左唔少～仲有海鮮有蝦及沙白，同樣吸引。其他配料都正正常常，有我最愛腐皮串串。飲品方面，除左啤酒任飲，仲有自家製果茶，不過我晏左少少去，所以試唔到，so sad...唔緊要，臨走食返杯雪糕補返數。