Babbo Trattoria (已結業)

XO仔因為一個清酒節，中午連續食咗三日快餐，講真食到有少少驚。難得週四有人請食晏，所以務必要食西餐轉一轉，老友記就揀咗喺小肥公司附近間「Babbo Trattoria」食意大利餐。之前黎食晚飯都已經寫過好評，明顯對餐廳各方面都好滿意，包括闊落舒適o既環境。細佬成千度近視，好多時都會因眼力唔係太好而忽略餐店內o既細節。如果唔係身邊好友提到，真係唔會留意到牆上原來掛滿金石良言。店子午市以做套餐為主，每客包有凱薩沙律、主廚湯、主菜及指定飲品。據悉，外賣冇加一之餘仲可享減$10優惠，聽落玩得過喎。凱薩沙律：沙律爽脆醒胃。主廚湯：忌廉南瓜湯清甜得黎唔溜。窯烤忌廉鮮蜆意大利麵（$88）：忌廉鮮蜆意粉熱辣香濃。蜆隻鮮甜肥美，食完數一數就知有成六隻咁多。菠菜蘑菇煙肉Pizza（$78）：薄餅乾巧鬆軟，雖則無肉，但其芝士濃而不俗，飽肚得黎一啲都唔溜滯，感覺好健康。凍齋啡：意外地凍齋啡屬極濃貨式。熱檸水：細佬都係第一次見熱檸水會跟一粒方糖喺隻匙羮上，認真搞鬼。