大餃子 (已結業)

銅鑼灣渣甸街一向多嘢食，今日經過見到有大餃子，見自己亦都 一段時間冇食餃子就入咗去試。今次係食lunch就order咗滋味配搭B餐，有四粒餃子可以選擇，我就揀咗牛肉大蔥餃子，另外有一碗四川擔擔麵，因為比較肚餓及聽咗員工嘅推介叫咗一份口水雞。牛肉大蔥餃子超新鮮牛肉味，配埋大蔥係一個好好嘅配搭，因為大蔥可以解膩同埋好有東北嘅風味，擔擔麵湯底少少辣但係花生醬味濃郁，配埋煙韌嘅麵條絕對係回味無窮。而最值得推介係口水雞，有少少麻辣配埋特製嘅醬汁，最緊要口水雞係無骨而且雞肉特別滑嫩，我一定會再嚟食大餃子！