餃掂手工餃子雲吞專門店

環境5分：中式小店格局，樓面超高，內牆貼左人生道理poster，卡位分佈响兩旁，都算寬敞，筷子响櫃桶內，慳位又方便，唔算迫，可以畀五分。衛生5分：每張枱都有盒紙巾同埋調味料架，好乾爽唔會黐立立，非常衛生，滿分。服務5分： 侍應生快手快腳，唔囉嗦，上菜爽手，半小時內食完走人，滿分。味道5分：灼至尊松茸豬肉餃大碗有一打十二隻，隻隻都皮薄餡靚，入面Ｄ豬肉嫩口得黎好實正，證明D肉好新鮮，成隻餃好甜，個松茸又香，附送果碗狀元九鼎湯呢非常之清，一D都唔油，好飲。2) 煎韭菜豬肉餃大碗有十隻，大大隻個餡都係咁實正，個皮煎到金黃色，非常有心機，個韭菜味好濃烈好突出好仲好鮮好爽脆同香口，超好味，性價比高。3) 上湯松茸時蔬係菜心，都好多條，粗身得黎冇渣，成條吞得落肚。4) 凍蜂蜜檸檬薏米好清甜好潤喉好解渴，一支一個人冇難度。抵食5分：百幾蚊一個人一餐飯有正宗餃子，有野飲又有碟菜，性價比非常高，非常抵食，一定滿分。