餃掂手工餃子雲吞專門店

環境5分：餃子連鎖店規範格局，散枱分佈响兩旁，空氣夠流通，地方幾大幾寬敞，內牆貼左D手劃公仔poster好得意，畀五分。衛生5分：筷子，醬油，醋，辣椒油，醬油碟，牙籤，紙巾放在枱上，仲有免費醬瓜蘿蔔任食，個架好乾爽唔會黐立立，非常衛生，滿分。服務5分： 侍應生爽手唔囉嗦，點菜上菜一樣咁快，半小時內食完走人，滿分。味道5分：1)    湯餃子至尊松茸豬肉餃，中份碗有八隻，皮夠薄，隻隻入面Ｄ豬肉大大舊，豐滿又紮實，中間食到有松茸。附送果碗狀元九鼎湯非常之清香，入到喉嚨好舒服。2)    日本龍鳯蛋一碟兩隻，預先一開二變咗四個半隻，分一半黑松露一半白松露，隻蛋凍凍地，有少少流心又溏心，非常特別。3)    煎餃子芫茜豬肉餃大碟有十隻，每隻都好實正，個芫茜味好濃好出，煎到餃子兩邊外皮金黃色，好脆好香口。4)    上湯松茸時蔬好多條菜心，大大條但都好嫩，個菇味好香，杞子夠甜。5)    凍自家製山楂雪梨水獨立一枝枝好衛生，飲唔完都可以方便攞走，個樽仲可以循環再用，開頭好清甜好潤喉，越飲越開胃。抵食5分：一餐飯每人百幾蚊有蛋有菜有餃子，仲有埋野飲，非常豐富同健康，抵食滿分。