養心殿台式養生鍋 (已搬遷) 新店位置

今晚又想打邊爐不過想食得特別啲喎，所以選擇咗旺角嘅養心殿台式養生鍋。餐廳地點方便，地鐵站出口大概行幾分鐘。入到餐廳，店員好快安排座位，餐廳裝潢幾好㗎，有懷舊Feel。坐底後先望望Menu，我哋選擇咗”寧神養心鍋”，因大家唔算肚餓，所以只係叫咗少少食物，包括極上雪花肥牛、千層凍豆腐、墨魚丸同翠絲水蓮，另外加支虎啤。坐咗大概5-10分鐘食物陸續送上。寧神養心鍋 - 個鍋一放底時已經聞到濃濃嘅當歸味，內裡有鮮雞、鮮魚及豬肉。一等佢滾咗，食物都未落已急不及待要試飲一啖，湯底真係好濃，味道夾雜住新鮮雞與魚味。食完後再飲，當然味道更加濃厚，飲完一碗接一碗，真係飲湯都飲到飽。極上雪花肥牛 - 肥牛份量都唔少，只要淥幾秒便可。肥牛牛肉味重而且好腍，食落猶如入口即融般。千層凍豆腐 - 豆腐本身比較硬，但淥完後變軟加上啲湯會浸埋入去，口感一流。墨魚丸 - 呢個值得推介，雖然唔係大大粒但咬落非常彈牙。翠絲水蓮 - 水蓮菜係本人打邊必叫嘅菜，一絲絲咁淥所以好快熟，餐廳選擇亦好新鮮食材。