新蒸武門 (已結業)

養生菜式工廠餐廳觀塘區好似開咗好多工廠餐廳，收工過嚟食完又近屋企，所以都可以過嚟食下。女仔周時都要補下，上次經過呢間餐廳，見到有燉湯，嘢食又fashion，所以拉埋男朋友嚟陪我食。我預早兩日book咗7:30 ，去到八成滿人，都多人食，所以同人搭枱，坐大圓枱。 叫咗是日推介燉湯，茶樹菇蟲草花燉豬展，三個餸，豉汁帶子蒸豆腐，芥末牛柳粒同埋麻辣口水雞。茶樹菇蟲草花燉豬展呢個燉湯感覺幾補身，雖然冇中藥材料，但係可能有蟲草花同埋豬展煲嘅關係，所以個湯拎上嚟已經好香。味道上冇味精，個湯應該燉左一段時間，補而不燥。豉汁帶子蒸豆腐男朋友鍾意食豆腐，我鍾意食帶子，豆腐喺底，帶子中間，帶子上面好多豆豉，兩個主要材料都淡味，所以加埋鹹小小嘅豆豉同埋豉油，食落都幾搞笑，唔錯。芥末牛柳粒呢個又係fashion菜，牛柳粒係油炸嘅，加埋啲紅椒、黃椒、翠玉瓜粒，撈芥末醬，小小辣得來有少少甜，幾特別。麻辣口水雞有成半隻雞，夠辣，岩晒我食。另外個茶都好健康，係菊花杞子紅棗桂圓茶，女生補品。