BnR (已結業)

天氣凍咗，想食啲暖笠笠嘅嘢，於是同同事去咗公司附近食熱辣辣嘅湯麵。餐廳主打美味嘅湯底，有雞湯、魚湯及特色湯。今次我哋叫兩個食午餐，有五指毛桃花膠雞淮山麵、海南雞泡飯（魚湯）及小食豆腐皮蛋。五指毛桃花膠雞淮山麵五指毛桃健脾補肺，佢嘅雞湯仲充滿五指毛桃味，加上濃郁嘅雞味，不油不膩，清澈順口，配上花膠及雞，滋補養顏，而且雞件嫩滑，再加上淮山麵，美味養生。海南雞泡飯（魚湯）海南雞嫩滑多汁，雞味十足，配上清甜嘅魚湯，湯飯仲有油炸鬼及木耳等配菜，配湯飯一流，非常美味。豆腐皮蛋豆腐嫩滑配上味道濃郁嘅皮蛋及芫荽，不愧一個經典小食。