八哥主題餐廳 (已結業)

八哥係種神奇嘅生物，有人話佢勁得意，亦有人話佢皺皮樣衰。但呢間八哥主題餐廳嘅食物無論你對呢種狗點睇都可以試吓。午市有平有貴，平嘅分分鐘抵過尖沙咀嘅冰室們。蟹肉牛油梨意粉好香蒜蓉味，但食嗰陣見唔到明顯蒜蓉粒，應該係好有心思咁連同牛油果一齊打成醬。蟹肉係貨真價實，絕非仿蟹柳，而且肉量相當多，亦好大粒，真正啖啖肉。肉醬千層麵雖然classic，但要做到麵皮唔乾，醬汁唔膩亦唔易。除咗面層嗰啲半焦芝士外，千層麵層與層之間都有唔少拉到絲嘅芝士，食落特別香。肉粒亦比一般肉醬大，更食到肉味。要數打卡王牌，必定係呢個朱古力mousse。狗仔幾可亂真，一條條嘅毛髮都睇得清清楚楚。食落去感覺似冰條，味道似朱古力奶，雖然唔知係咪因為雪得好硬，質地同心中預期比較creamy嘅mousse有啲落差，但不計菜名，只講色香味嘅話隻狗絕對「劏」得過！呢個甜品set有埋芝士蛋糕，份量都幾大，成個set足夠比3-4人share。餐廳雖然冇真狗，但食物味道唔錯，即使唔計主題亦食得過。