阿詩瑪壹菌 (已結業)

尋日嗜辣閨蜜約食飯吹水，介紹左雲南菜「阿詩瑪」。第一次食滇菜，一到門口，見到裝修好有中國風格，以紅色為主，但完全唔老土，仲幾有型格，即時加分唔少。首先試左水煮牛肉，辣度可以自己揀，一上枱聞到好香花椒味，牛肉好大片又嫩滑而且幾彈牙，牛肉都幾濃，做到又香又麻又辣既效果。娃娃菜、芽菜同薯粉都吸左牛肉以及辣汁精華，好入味。之後酸菜魚片，冇坊間泥土味，每片幾乎都有手板甘長，所以啖啖魚肉好正，不過依然仲有些少幼骨，但冇影響到魚肉既鮮甜同滑，配合左酸菜既酸，湯底既辣，更加吊出魚既鮮，正到不得了。滇醬肉絲加左秘制醬汁，令肉絲香味四溢，用左薄餅皮包住蔥絲同青瓜絲食，感覺有如食北京填鴨。惹味薯仔絲好爽脆，直接加入酸菜代替用白醋，另有青紅椒同乾椒，酸酸辣辣好開胃。