Cafe de Paris Est. in Korea (已結業)

喺韓國一度風靡全城嘅鮮果沙冰店，上年駐入香港銅鑼灣，同樣成爲少女們嘅潮聖熱點。小編好奇點解會叫Café de Paris，原來係創辦人喺法國留學時結識到太太，之後兩人想將呢份浪漫甜蜜帶返韓國，造就呢間好Sweet嘅Cafe。店舖以海外新鮮空運生果Bon Bon為主打，現時有士多啤梨、芒果、青提子、車厘子四款生果口味，店舖亦將推出不同新口味，好期待添。係呢度嘅熱款Bon Bon杯，面層鋪滿大量由韓國新鮮直運到港嘅士多啤梨，粒粒都好大粒，而且香甜多汁。cream入口相當幼滑，就連怕肥膩嘅小編都忍唔住食多幾啖。食到中間部分仲有冰涼士多啤梨沙冰，就算士多啤梨沙冰都係韓國直運鮮果醬再人手後製嫁。整一杯士多啤梨杯看似簡單，但其實無論係食材定份量都好講究。提子形成一個小山丘，驟眼睇應該有20~30粒提子，好震撼。提子係美國直運，粒粒青提似乎都有精心挑選過，食完成杯都無粒係唔新鮮嘅。店主好貼心，因應唔同客人需求，仲特別推出Mini Size嘅生果杯，同樣有口味，細細杯最啱小朋友啦。