越色牛肉粉餐廳 (已結業)

又要係尖沙咀搵食，午飯時間真係搵食艱難，行去亞士厘道睇下有咩食，見好耐冇食越南野，就試下啦，要搭𨋢上2樓，一上到去就見到餐廳門外好多人排隊，探頭入去餐廳睇睇，地方好大亦都好多張枱，但真係全場爆滿，咁睇黎應該質素有d 保證仲有時間，就拎飛等下啦，2人坐應該好快既，等左5分鐘左右就有位。即刻睇睇有咩食，都係越南特式撈檬粉，湯粉，飯咁。套餐大概$50-60連飲品，午飯來說中位價錢。今次就選左炭燒豬扒湯檬粉試試啦！豬扒同檬粉係分碟上既，豬扒已經切開左，唔會成大塊咁要自己切，面頭仲有好多蔥同炸蒜，超香口，仲要炭燒味好香，已經覺得好吸引。豬扒入口肉質好好，半肥瘦，而且冇乜骨，最岩唔鐘意食骨既人，而且燒汁醬都好味，味道都適中，唔會太咸。檬粉湯底就正常，可以自己添加小小辣椒醋增加味道，但我覺得唔加就咁清湯都好味，檬粉都好大碗，同價錢相乎啦！結算人均消費$65。可以接受