麺屋武一 (已結業)

又一日本拉麵過江龍登陸香港 麵屋武一，開業只有一個月左右，店家主打雞白湯拉麵，強調湯底同配料雞叉燒，雞肉丸由日本直接入口，我點左濃厚醬油拉麵$88，配料有雞叉燒，雞肉丸，半熟蛋要加錢$12，湯頭入口的確雞味濃厚夾帶住微微醬油香味唔錯，麵係幼麵，幾爽幾滑，但雞叉燒同雞肉丸就比較一般雞叉燒肉味淡有啲鞋口，半熟蛋亦煮過時間太熟，仲有洋蔥碎入口有啲乸口(應係係部分太大粒唔夠幼細，刀功問題，如果用紫洋蔥效果可能會好好多，純粹個人意見)其實一間食店除左食物質素重要外，服務亦好重要，我坐bar枱隔離仲有兩位食客，當佢哋埋單走左後啲麵碗竟然無人收，嗰時其實唔忙連埋我只有三位客人，服務員行過去只係將麵碗疊起就走左去，去左邊？就係去左收銀附近食嘢，你係咪真係咁肚餓呀？執幾隻碗抹下張枱要幾耐時間呀？呢啲本身就係你工作啦，唉…話晒都係日本品牌過嚟香港開店點解會做得咁差，如果當時有其他食客入嚟見到真係好難睇，一枱都係碗無人收但服務員係喺度食緊嘢喎，難怪香港拉麵業做極都唔好啦，就算幾出名嘅日本品牌拉麵嚟到香港一樣做唔起，就係多得呢班人，希望有關方面真係留意下。