火星料理 (已結業)

喺樓下經過好多次，成日見佢派傳單，但係冇乜留意呢間係食啲乜嘢，今日有個朋友就話想試吓，睇到張傳單叫做火星料理，個名又幾特別喎，原來就係食韓國嘢，選擇都有好多款，有成3.40款可以俾你揀。上面嘅裝修設計簡約，大概有4.50個座位左右，一坐到落去店員就已經攞啲錢菜小食比我地，一個人會有兩碟，我地五個人就總共有10碟，睇嚟都幾多，又靚又好食咁樣，不過如果想添加嘅，宜家就唔可以啦。我就叫左個婆婆牛肉大醬湯配白飯，個湯入面嘅配料有洋蔥，有豆腐，有魷魚等等，飲落去有啲似日式面豉湯嘅味道，但係佢嘅味道比拒更加住家，再加埋有少少海鮮，煮出嚟嘅湯味道幾好，陪埋一碗白飯，夠唒。另一個叫咗招牌炆牛肋骨飯，呢個飯係我推介嘅食物，一份大概有三夠大嘅牛肋骨，有一個紅蘿蔔，同埋一個薯仔。佢嘅質料味道好住家嘅感覺，有少少似自己屋企嘅薯仔炆雞翼，呢度就再加左啲韓式嘅元素，味道偏甜，但係我中意嘅口味。其他朋友就叫左韓式拌飯，辣醬豬肉炒粉絲同埋韓式炸醬麵配紫菜飯卷，份量都幾大，拒地話除咗個韓式炸醬麵味道唔算太好之外，其他味道都唔錯，而且價錢都算合理，下次再可以過嚟試吓其他嘢。