龍門冰室 (已結業)

最近武漢病毒肆虐香港，搞到少左人出街食飯，連平時大排長龍ge龍門冰室都唔洗排隊，咁岩今晚太夜收工，屋企無飯食，就同朋友去支持下啦。餐牌都幾多選擇，小食、常餐、粉麵飯、鐵板都有，飲品仲有特色咖啡添。雞翼新鮮出爐熱辣辣，表面淋上蜜糖，皮香肉嫩幾滋味。雖然叫玉子燒，但其實似港式奄列，配芝士吞拿魚都係第一次試，幾足料濃厚。吉烈蝦唔算油膩，夠熱。燒汁撈丁又係第一次試，燒汁本身味濃，撈埋都唔錯。韓式泡菜鐵板珍珠飯其實同鐵板配飯差唔多，不同之處就係用上朋友鍾意嘅泡菜同珍珠米，再配埋龍蝦汁，朋友嘅配搭真係幾新奇，但食落又出奇地唔錯喎。鐵板西冷大大塊，雖然冇得揀幾多成熟，但煮出黎又唔會全熟咬唔開，牛味尚可，好彩有香而不膩嘅黑椒汁搭夠，香草腸大大條非常香，薯條亦都夠脆，唔會腍晒。奶茶紅豆冰呢個組合之前係第二度試過，但飲落得奶味，而龍門呢杯就保留到茶香，同紅豆幾夾，但甜左啲，下次要叫少甜先。咖啡同朱古力味道雖平衡，但整體較淡。估唔到係冰室飲到Green Tea Latte，雖然奶泡唔多綿滑，但茶味同奶味配合得幾好，好飲。