緬甸招牌湯米線 (已結業)

其實都已經食過呢間緬甸招牌米線幾次，但位於勝利道嘅店真係比較少位，所以我哋通常都係外賣，但外賣返到屋企食，味道一定無堂食咁正啦！發現原來喺附近開咗分店，大好多，所以今次就決定坐定定食返次先！我就叫返平時最愛嘅曼德勒鮮茄滋味撈麵，佢啲香料加落啲蕃茄度煮個濃稠嘅醬汁，麵質有咬口，較幼身，完全係我杯茶呀！之後叫咗酥炸黃金脆蝦餅同緬甸黃薑脆脆雞翼，略嫌炸過火咗少少，但完全無影響味道啊～大少就揀咗曼德勒紅燒腩肉飯，我試咗少少，味道帶少少甜，都幾開胃。腩肉亦煮得幾好，稔得嚟依然有應有嘅質感！緬甸菜真係香港比較少，尤其小店經營又好味，一定要多多支持 ～