姚姚酸菜魚 (屯門市廣場2期) (已結業)

好中意食酸菜魚！但要喺香港食到符合自己口味嘅酸菜魚都唔係咁容易，姚姚酸菜魚都算係其中一間會重複幫襯嘅。一年多無食，今次就約埋朋友黎左屯門分店食午餐。每次黎都係食酸菜魚，今次就決定試下其他款式，叫左個蕃茄魚。蕃茄魚雖然話係二人份，但係份量超大！超大碗蕃茄魚，入面嘅魚肉份量都好慷慨。用左新鮮鱸魚，魚肉嫩滑鮮味，蕃茄湯底好濃厚香口，酸甜嘅湯底更加開胃！好中意入面有粉絲可以索下湯汁。另外午餐時段仲有多款性價比高嘅午市套餐提供，呢度竟然都食得到麻辣燙！麻辣燙套餐可以自選湯底、麵底同埋3款海鮮/鮮肉同3款蔬菜。份量同樣大得驚人！我揀左香濃麻辣湯，味道正宗對版，辣度亦恰到好處。配寬薯粉條口感煙韌。配料揀左肥牛、牛柏葉、魚片頭、蓮藕、千葉豆腐、金菇，配料份量都俾到好足，好飽好滿足！個套餐本身仲包埋手打檸檬茶，同埋三色冰粉用黎解辣！另外再單點多一份紅豆烏龍冰粉，呢個比起套餐入面會大份好多，材料亦更豐富！不過烏龍冰粉同樣好滑溜，烏龍茶香夠晒突出。