丼瀛 (已結業)

臨別依依，要搵間充滿香港情嘅餐廳食飯，朋友鍾情日本菜，最後決定揀呢度。💕未食已經被環境四周攝住了眼，連豬、連儂牆盡在不言中嘅回憶，聽住喜歡嘅音樂進食，胃口大增。點了茶碗蒸、蟹肉卷、壽司杯、炸蠔、芝麻雞翼、仲有炸豆腐。6樣嘢食，兩個人份量，應該夠食，唔夠先再加。每道菜上枱，侍應都會禮貌兼用心咁介紹菜名，呢份發自內心嘅殷勤，真係會令用餐感覺更愉快！🍥茶碗蒸($38/碗)：滑捋捋，鹹淡度適中。🦪吉列廣島蠔($48)：蠔唔會太大隻，炸漿亦唔厚，每人食兩隻都唔會覺得太滯、太油膩。🍣碎三文魚松葉蟹肉卷($68)：每粒都四四方方，剛好一口食晒，口腔充滿三文魚油脂香，蟹肉嘅甜。🍗芝麻雞翼($48)：炸得金黃，但仍保持到肉汁，入口香脆美味。🥢木魚花炸豆腐($58)：侍應話可以點汁食，又或直接將醬汁淋上豆腐伴混食。前者食法仍保留到木魚香脆口感，但豆腐未必能沾上醬汁；而後者將醬汁伴混食，起初擔心會太濃味，但事實又唔會喎，只不過真係會稍微減低了脆口度。🍱最後當然要講埋超靚嘅壽司杯啦。“築地壽司杯”($188)，刺身包括三文魚、,碎葱吞拿魚蓉、帆立貝、蟹肉蟹膏、黃金魷魚、甜蝦。壽司杯極吸晴，完全配合到相機食先。