堅韓牛韓燒放題 (已結業)

三款套餐分別係美國牛、和牛同韓牛，揀咗中間價位嘅體驗和牛套餐，已經包埋刺身、海鮮、串燒等好抵食。餐廳非常貼心，會將牛油紙放喺烤爐上，冇咁易濃之餘又可以減少油煙，再加上每張枱都有專屬嘅抽氣系統，食完唔會成身都係油煙味，乾淨又企理。飲品選擇繁多，除咗茶類同汽水之外，有唔少特色嘅韓國品牌飲品，而且連啤酒都可以任飲。食物方面刺身都有7款選擇，叫得多師傅仲會用刺身擺出各款造型，睇得又食得。主角當然係牛肉，牛仔骨、牛肋條、牛板鍵、一口牛等各種部位都有得揀，必食推介係肉眼扒，切得好大塊，紋理清晰，肥瘦均勻，食落牛味濃郁。至於海鮮類就有海蝦、帆立貝、魷魚翼等，魷魚翼爽口彈牙，辣辣地好惹味。時令生果今日有西瓜菠蘿，菠蘿燒過更加香甜，西瓜就咁食清爽解膩。原來韓燒完仲可以轉打邊爐，可惜今次食得太飽，下次再試！