金田家 (已結業)

香港人一向都好鍾意食拉麵，而我當然唔例外，將軍澳近來都開咗唔少拉麵店，呢日約咗朋友食飯，就嚟到將軍澳中心新開嘅金田家。餐牌上有唔同口味嘅拉麵，包括魚介豚骨拉麵、柚子辛口拉麵、辛子黑蒜拉麵等等，客人可以跟據自己口味，揀選拉麵嘅軟硬度同走唔走青咁。先嚟嘅辛子黑蒜拉麵，我追加咗三塊黑豚叉燒同糖心蛋，拉麵賣相唔錯，黑色滿滿嘅黑蒜油，味道香濃，拉麵份量亦好多。拉麵嘅麵身爽口彈牙，而配菜味道唔錯，爽脆嘅木耳絲同香口嘅紫菜，令拉麵有唔同嘅口感。而追加嘅黑豚叉燒比普通豚肉叉燒更香口而有肉味，略燒過嘅表面，添上惹味嘅焦香。糖心蛋嘅蛋味好香，外面有醬汁味，咸香軟滑。大食嘅朋友就叫咗魚介豚骨拉麵，追加咗芽菜同替玉，魚介豚骨拉麵上面有唔少魚仔，比普通嘅豚骨拉麵更加特別，不過就好濃郁魚介味，中意淡口少少嘅人就未必鐘意，但朋友就覺得唔錯。海老餃子煎得好香，入面唔少蝦肉，非常Juicy，而且一啖一隻，好啱女仔食。另外仲叫咗兩杯梳打，分別係生薑柚子乳酸梳打同士多啤梨乳酸梳打，我就比較鐘意士多啤梨，酸酸甜甜，好醒神。食物質素都唔錯，價錢唔算貴，下次再試下其他口味嘅拉麵。