薰甘同味 (已結業)

已經食過薰甘同味好多次，由佢初初開張$35一碗食到依家$40一碗，講緊都係一年內既事。雖然貴左咁多，但我都依然返轉頭，全因為佢既白咖哩湯底同豬軟骨!湯麵套餐先選湯底，再選一款配料，最後選麵底。另包括一杯野飲。而我10次裡面有9次都係白咖哩湯底+豬軟骨拉都麵~白咖哩湯底香濃，一D都唔辣，每次我都幾乎會飲哂成個湯。雖然白咖哩都算係重口味湯底，但飲完一D都唔會口渴!不得不提係佢既豬軟骨，豬軟骨味道帶甜，似日式做法，豬軟骨燜煮得非常淋身，淋身程度就算無牙婆婆都可以輕鬆食到。可以見到裡面既軟骨都已經變成啫喱狀，好明顯係經過長時間燜煮而成，食得出店主既用心製作，唔似坊間一D豬軟骨咁，D骨係硬到食唔落。麵底可以自選自家製拉麵/烏冬/米粉/米線/油麵。我今次揀左烏冬，烏冬煙韌，無特別。以往我都係食自家製拉麵，麵身有少少彎曲，口感煙煙韌韌幾有特色。配料有白蘿蔔，雖然已經過左白蘿蔔最靚既時候，但蘿蔔依然好清甜，好淋，無渣。如果你係第一次黎食，一定要揀馬拉白咖哩湯+豬軟骨+自家製拉麵，三樣野都好有特色，包你一試愛上!