Ilis (已結業)

呢晚同朋友嚟試下新開既餐廳，餐廳雖然唔太大，但感覺舒適。叫左二人套餐。抹茶latte有漸變色望落好靚，但飲落非常苦，加左糖漿苦度依然太高。朱古力latte同樣有過苦既情況，濃到太高，難以入口。水牛芝士配紫蘇梅番茄凍就唔錯，香濃既芝士加上彈滑帶酸既果凍，好清新。法式焗田螺底下薯蓉軟滑，田螺都幾多而且冇沙。磨菇湯黑椒味偏重，蓋左磨菇既香味，但整體都幾滑。Parma ham沙律沙律菜新鮮爽脆之餘，火腿油潤軟滑，配上香濃既芝麻醬，唔錯。松露雜菌燴飯本來以為系意大利飯，原來唔系，用上長米既飯煮得比較濕淋，口感一般，但菇味都幾濃。慢煮牛柳配大蝦就唔錯。牛柳淋滑有鮮味，生熟剛好，醬汁恰到好處；大蝦亦爽彈鮮甜。甜品要左朱古力心太軟同焦糖燉蛋。心太軟外脆內軟，朱古力味濃郁；焦糖燉蛋面夠脆，裏面軟滑。甜品反而有驚喜，其他有待改進，希望小店繼續努力。