禮 (天光道) (已結業)

近排發現咗喺土瓜灣呢一間日式隱世小店， 餐廳裝修好特別，最喜歡係天花吊住嘅大月亮燈， 好似大大個月球近在咫尺咁。入到餐廳侍應介紹咗佢哋近排最當造嘅生蠔， 兵庫縣室津生蠔， 立即決定點一盤嚟試下， 生蠔十分肥美， 海水味唔算太重，反而比較creamy， 生蠔超級新鮮，值得一試。另外點咗個刺身盛， 分別有加拿大海膽，深海池魚，帶子，赤蝦， 赤身，帆立貝， 不得不讚佢嘅加拿大海膽 ，鮮味濃， 一啲都唔腥，超好食，而且份量亦都好足， 佢所有刺身都好新鮮。松露半熟牛肉他他， 呢個真係水準之作， 和牛煮到半生熟，多汁軟嫩，配埋洋蔥味道一流。青森青提豚肉卷， 豚肉捲著青森青提外脆內軟，青提嘅清爽口感， 伴著油脂重嘅豚肉，令到豚肉唔會太油膩。牛蒡素肉丸串， 牛蒡味重， 喜歡素食嘅朋友可以試下。亞波美手羽先， 雞翼烤到恰到好處， 皮脆內軟。明太子油揚豆腐， 呢個真係好少喺其他地方食到， 豆腐炸到脆卜卜，配埋鹹香味重嘅明太子，好似食緊炸多士咁。芝士玉子燒， 玉子卷蛋味重，配埋醬爆芝士 ，味道一流。