星廚 (已結業)

今日原本想去太子食餃子，但估唔到9點後都仲有人等緊食餃子，最後經過見到星廚的晚餐好似幾吸引，又唔需要等位，就一於試下。星廚地方唔大，檯同檯之間有少少逼，但環境又唔算太差，格局有D似高級西餐廳。餐牌選擇唔算多，意粉同飯類加埋都係得10款左右可以揀，最後叫左一個意粉同一個飯，跟餐送餐湯同飲品，送晒兩樣都好抵下。雜菜湯 - 味道一般，個人認為敗筆係因為D配菜都係比較硬，好似西芹個D似係最後先加入個湯度，而唔係平時羅宋湯咁D菜比較融為一體。大蝦黑松露醬意大利粉 - 大蝦真係好大隻同有好多隻蝦蝦蝦，不過似係雪藏蝦冇咩鮮蝦味。反而意大利粉好香黑松露醬味，炒過的意粉軟硬適中，仲要有唔少沙律菜，味道相當唔錯。咖喱牛肋條飯 - 咖喱偏香辣，牛肋條啖啖肉又炆得夠淋，而且配菜都好食。值得一讚係食物分量都唔少，大食的朋友都夠食啊!最後見到隔離檯叫左鋸扒的質素好似都唔錯，下次有機會真係想試下。整體而言，食物質素頗優，環境都企理，性價比真係唔錯，有機會可以一試。