素味牽 (已結業)

今日終於用誠意打動咗食肉獸陪我食素，所以就嚟咗開業不久嘅素味牽。入面嘅裝修環境簡約，令人坐得舒服，感覺寧靜。素菜套餐選擇豐富，而且佢仲有定時轉換餐牌，所以每一日去幫襯都唔會覺得悶。菜式亦都唔單調，素菜配合意式香草仲有米線俾你揀，聽落都覺得好特別。仲有素菜版黯然銷魂叉燒飯，賣相就好似食神裏面嗰份咁都似模似樣。最後決定要咗一份素菜套餐，揀咗麻辣蘿蔔牛腩、咕嚕肉，仲加咗$5配炒菜一份。佢嘅麻辣汁令我覺得好驚喜，好香嘅麻辣味但又唔算好辣，而且佢嘅蘿蔔好入味，牛腩就用一啲菇類製成，都幾像真，咕嚕肉亦都做到酸酸甜甜，配合三色椒，真係覺得自己好似食緊咕嚕肉，但就冇食肥豬肉嘅感覺，健康得來又好味，只係加$5就有好大份嘅炒菜，而且呢度仲可以添加白飯，真係好抵食。餐湯係蕃茄豆腐湯，蕃茄湯底蕃茄味非常濃郁，我飲第一啖就覺得應該要配埋個通粉放落去一齊食，咁就正到不得了。另外嘅意式香草雞麻香米線又係一個驚喜之作，因為餐牌本身冇食物嘅圖樣，所以我點嘅時候心態上只不過係想食個米線，到上菜嘅時候見到賣相就已經覺得好驚喜，首先就係有一大片炒滑蛋，撈米線係帶有香麻味道嘅白汁，仲有炸雞粒，真係覺得呢個fusion菜好有驚喜