點點心點心專門店 (已搬遷) 新店位置

跟朋友同樣係「點心愛好者」，成日心思思想去食，但兩個人走酒樓又貴又唔知邊間好食，最後上網查到呢間「點點心」又近工作地點，當然要嚟試下！點心款式唔少，但當然無酒樓咁多，不過好多點心都相當特別，喺一般酒樓唔會食到！因為兩個都未食Lunch，所以擔心剩要點心唔夠飽，所以叫咗份 金銀蛋瘦肉粥 ，其實就係平時食嘅皮蛋瘦肉粥嘅加咸蛋版，調味十足，就算唔加胡椒粉都好好味！不過為咗滿足自己100%試味嘅心，緊係要加脆脆同胡椒粉啦！之後嚟緊就係 真係菠蘿包 ，因為真係用菠蘿做餡先會用叫呢個名，不過自己唔係太鐘意食識嘅菠蘿，所以好感一般。而且真係要趁熱食，一凍咗就打哂折扣。飲茶又點少得 蝦餃、燒賣、山竹牛肉呢三寶！蝦餃 ，皮唔算太薄，但非常好食，而且餡有成3、4隻蝦，爽口非常！皮太薄反而會包唔到，超好食！燒賣 ，最意外地好食嘅一款點心！估唔到入面都係用蝦做餡，仲唔只一隻，今餐最鐘意嘅點心！山竹牛肉 ，無咩驚喜，但比出面食嘅水準都要高。最後嚟嘅係 脆皮鮮蝦腸 ，同樣，腸粉皮唔算薄，不過入面嘅脆脆同蝦都幾好食。可惜自然反應下將豉油倒咗落去，先醒起會淋哂，好彩都救得翻，極速完食！