池記 (已結業)

去過九龍灣o既人都知，食肆多，但人仲多。想搵食，其實好難。上星期六晚七點幾，諗住搵唔到位就返屋企附近先食。經過池記，竟然有位。諗住未食過，不妨試吓。有幾款晚餐可以揀，於是同太太倆個揀咗：牛筋撈麵配芥蘭(油菜)、蘿蔔牛筋腩菜飯拼米通炸鯪魚球(小食)，加$2 有杯豆漿添。牛筋撈竟然最先到，牛筋夠腍夠入味，味道算唔錯。撈麵亦爽口，整體算係高價高品質吧！豆漿就唔係咁得，淡而冇味，真係$2水準。菜飯啲牛筋腩比較實淨，味道濃啲。蘿蔔唔嚡冇渣，仲有少少甜。菜飯份量夠，一般比較油，佢都唔例外。芥蘭冇特別。米通炸鯪魚球好味，炸得透，唔腥！仲要熱辣辣登場，加分唔少。服務唔算好有禮貌，但勝在有效率。