上海姥姥 (星光行)

營業中

休息中

果日搭船從中環過去尖沙嘴已經開始落雨，所以快步衝去星光行，睇下有咩食，見到上海姥姥，以前都食過，覺得味道同價錢都可以接受，所以入咗去坐低。我哋一行三人，我、老公同埋囡囡，叫咗一個餸同埋兩個主食。餸係賽螃蟹，同其他地方嘅做法差唔多，都係炒蛋白咁樣，不過佢放咗瑤柱落去炒，有海鮮味一d，加上碟賽螃蟹中間仲有個蛋黃，整開佢，等蛋黃汁同蛋白混合埋一齊，唔單止賣相更加好睇，而且口感會更加滑。雖然佢本身已經調得好好味，但係我都係習慣加d醋，覺得味道會更上一層樓。至於兩份主食，一份係上海餛飩蔥油拌麵加配排骨，另外一個係黃金蝦仁炒飯飯。我個人比較欣賞個炒飯，佢加咗鹹蛋黃，好入味，有d甘香。但係老公同囡囡比較鍾意個麵，我個人係略嫌味道有d淡，不過香味係足夠嘅。最美中不足嘅係，呢間餐廳無提供bb凳，帶bb去嘅家庭就未必適合啦。價錢方面，我哋食咗三百幾，平均一百幾一個人。