阿四車仔麵 (已結業)

今日黎到旺角鼓油街試食呢間阿四車仔麵，去到覺得佢嘅門面同餐廳內部裝修都非常之有格調，比人感覺坐得好舒服而且一啲都唔污糟，仲有酒精搓手液提供，值得一讚呀！入到去老闆仲問我地想坐邊度，臨走仲同我地講bye-bye，好Nice呀！坐低睇menu，呢到嘅車仔麵有超過30樣餸可以揀，仲有十幾種麵同醬汁任你配搭，另外仲有十款招牌小食同有大碗飯揀，正呀！睇左一輪Menu，我最後就揀左個四餸油麵同兩款小食，小食全部都係$20，好抵，而三餸麵就係$38，加一餸加$9 。跟餐飲品仲有減$8嘅優惠添！唔洗幾分鐘就上齊啲野食啦，碗碗都好大碗好足料呀！我揀左沙爹醬，佢係用匙上比我地自己撈勻嘅。係餸菜方面，我覺得呢四樣餸都非常之高水準架，豬大腸係用滷水汁煮嘅，煮得超入味，好香濃架，仲粒粒都勁大粒，非常推薦！牛腩每一舊都好大舊，燜得啱啱好，好軟淋同夠入味！冬菇嘅菇肉好厚實又大大舊，一樣係好入味！最後就係溏心蛋，同係比一隻蛋而唔係半隻，最愛溏心蛋嘅我真係好驚喜！另外兩樣小食，我就叫左日式吉列蠔同炸唐揚雞塊，兩個都係皮薄餡多，一啲都唔hea架，仲加左泰式酸辣醬添。